गडचिरोली भागात वैफल्यग्रस्त नक्षलवाद्यांची फलकबाजी

By | September 24, 2017

गडचिरोली : नक्षलग्रस्त भागातील तामंदला येथे नक्षलवाद्यांच्या फलकांची जाळपोळ, गुर्जा येथे नक्षल स्मारकाची तोडफोड गावकऱ्यांनी केल्यानंतर पुन्हा नक्षलवाद्यांनी एटापल्ली येथील वन उपज नाक्यावर फलक व भित्तीपत्रके लावून २७ सप्टेंबपर्यंत ‘माओवादी संघटना स्थापना दिवस’ साजरा करण्याचे आवाहन केले.

गावकरी नक्षल्यांना गावबंदी करण्याची शपथ घेत असतांना नक्षलवादी आता लपून येऊन गावांत फलक लावून दहशत निर्माण करण्याचा केविलवाणा प्रयत्न करीत आहेत.गडचिरोली जिल्हय़ात गावकरी नक्षलवाद्यांच्या विरोधात आता आवाज उठवायला लागले आहे. गडचिरोली जिल्हा पोलिस दलाच्या वतीने ग्रामीण भागात जनजागरण मेळावे व अन्य माध्यमातून मोठय़ा प्रमाणात विकास कामे करीत आहेत.

नक्षलवाद्यांच्या विरोधात गावात आवाज उठत असतांना नक्षल्यांनी पुन्हा फलक लावणे सुरू केले आहे. एटापल्ली येथील वन उपज नाक्यावरील शासकीय योजनांची माहिती प्रसिध्द केल्या जाणाऱ्या फलकावर अन्यायाविरुध्द कठोर युध्द पुकारा व माओवादी संघटना स्थापना दिन २१ ते २७ सप्टेंबर साजरा करा, असा मजकूर लिहिलेले नक्षली फलक लावल्याने नागरिकांमध्ये भीतीचे वातावरण निर्माण झाले आहे.

अहेरी तालुक्यात नक्षलवाद्यांनी उभारलेले शहीद स्मारक गावकऱ्यांच्या मदतीने पोलिसांनी तोडले आहे. त्यामुळे नक्षलवाद्यांमध्ये कमालीचे वैफल्य आल्याची परिस्थिती आहे . चोवीस तास वर्दळीचे ठिकाण असलेल्या एटापल्ली-अहेरी व सुरजागड गट्टा अशा त्रिकोणी तपासणी चौकात शासकीय योजनांची माहिती प्रसिध्द करण्यासाठी फलक लावलेला आहे. नेमका याच फलकावर रात्री ९ वाजताच्या दरम्यान नक्षल्यांनी फलक लावल्याने तालुक्यात जनसामान्यात भीतीचे वातावरण आहे.

दरम्यान , धानोरा तालुक्यातील रहिवासी सनिराम सनकू मडावी (२१) या नक्षल समर्थकाने गळफास लावून आत्महत्या केली. सनिराम याच्याविरुध्द नक्षल समर्थक म्हणून गुन्हा नोंद आहे. मागील दहा दिवसांपासून तो बेपत्ता होता. गावकरी त्याचा शोध घेत असतानाच लगतच्या जंगलात त्याचा मृतदेह मिळाल्याने खळबळ उडाली आहे.

??पोस्ट आवडली तर लाईक करा शेअर करा ??